Mooi Stientje, de sleep,
In hör Butz weer 't so heet.
Se drööm – ja wat drööm hör:
In 'n Drööm harr s' al freeit,
In 'n Drööm harr s' al 'n Keerl,
Ja, in 'n Drööm weer s' al 'n Froo,
Harr Knechten, harr Maiten,
Un Kinner d'r to.
Un se wuss nich, wo 't kweem,
Man hör Keerl fung an t' schellen:
„Wat sall 'k mit dat Goodje?!“,
Un Stien stunn to tellen:
Een twee – dree veer fiev –
Nee, nu scheelt 't hör tovööl! –
sess söven acht un negen –
Dat weer di 'n Gewöhl!
Teihn elven – dat kreet
Un dat mook di 'n Gebrull:
„Dat 's mien Schoh! Dat 's mien Büx!“
Un hör Keerl stunn un schull,
Un se wuss nich, wat s' sull,
Un se sprung ut de Butz:
Wat good, dat 't man 'n Drööm weer –
„Harrejasses! 'n heel Dutz!“
Moritz Jahn, een van de grote oostfreeske Dichters.