Walle! Walle manche Strecke,
dass zum Zwecke Wasser fließe
und mit reichem, vollem Schwalle

Wat pladdert dat!
Dor kladdert wat
heel patschenatt
in´t Regenfatt.

Man, soveel Regen
wallt uns integen!
Nich allerwegen
bringt Regen Segen.

Veer Doog mucht´t duuern,
mestnatt de Muuern
vun´t ewig Schuuern.
Verlohnt al truuern?

As dat so rieselt,
den Dag vernieselt
un mi dat grieselt
- sitt´t Lüüd un stieselt.

Nee, wat dat strullert!
Dör´t Fallrohr bullert
dat Woter - gullert
in den Kanullert.

Man, soveel Regen
flütt uns integen!
Nich allerwegen
bringt Regen Segen.

So natt un smuddrig,
totol fuchtschuddrig.
De Lüüd ward tuddrig
un gresig knuddrig.

Dorto dat Platschen,
an´t Finster klatschen.
Mit Hänn´n rabatschen,
den Mulm opmatschen.

Dat blifft so diesig,
meist duff un miesig,
nattkoolt un griesig,
- puuh, pinkeliesig!

Man, soveel Regen
schuuert uns integen!
Nich allerwegen
bringt Regen Segen.

Dütt Smadderweer,
undeugsch verquer,
wi wüllt´t nich mehr!
Kummt Sünn? Wennehr?

Mi mookt he mall,
dé Woterswall.
Nu is´t wohl ball
een Sintflootfall.

Een poor Doog loter
streumt Okerwoter,
eerst dör de Aller,
rin no den Kaller!

O du Ausgeburt der Hölle!
Soll das ganze Haus ersaufen?
Seh´ ich über jede Schwelle
doch schon Wasserströme laufen. \\
Nu denn: Ik Schrieverich
seet dreug in´t Huus
un schreev mit Gruus
düt Pissgedicht.
Schull ik dat nich?

Kursivdruck: Zauberlehrling (J. W. Goethe)