Sneeiwittje, Grafendochter ut Oostfreesland

Sneeiwittje was blond! Dat lett ja düchtig na BILD-Zeitung – mutt je alltied weer wat Nejes her – man 't kunn best wesen. Of, beter noch: 't stimmt. De Wetenskupp hett daar achteran seten, un – dat mutten Ji sülvst lesen. Sneeiwittje is een van de bekennsten Märken, de wi dör de Bröörs Grimm kennenleert hebben. Un bi de Bröörs heet dat ja van „Haar, swart as Evenholt“. Man dat is blot de halve Wahrheid. De Grimms hebben de Märkens fakerder bearbeidt, alltied weer. Un in de allereerste Handschrift steiht noch, dat Sneeiwittje Ogen harr, swart as Evenholt un Haar van gele Klöör. Se was blond. En Försker ut Hessen, Eckhard Sander, hett sük al Jahren mit dat Thema befaat, un he hett unnerfunnen, dat Sneeiwittje de Dochter is van de Grafen van Waldeck. Se leevde in 't 16. Jahrhunnert. All good, seggen Ji nu, un wat nützt uns dat? Gudrun Anne Dekker ut Nörden hett ja twee Hobbies: Oostfreeske Histoorje un Familiengeschichte. Un se kreeg de Grafenfamilie von Waldeck in 't Vermick, de wassen unner annern ok mit de Cirksenas ut Oostfreesland verwandt … un daarbi kwamm hör de Verdacht: Margaretha von Waldeck is 'n Frau ut Oostfreesland un Sneeiwittje hett oostfreeske Wuddels! De Moder van dat Wicht, dat wi as Sneewittje kennen, Margaretha Cirksena, is geboren in Emden. Se hett de hessiske Graaf traut un stunn in hör Leven un na hör Overleden hoog in Ansehn. Un hör Dochter hett van hör de gode Charakter arvt, dat moje Utsehn un dat blonde Haar. Eckhars Sander harr in 't Stadtarchiv van Bad Wildungen Dokumenten funnen ut dat 16. Jahrhunnert, daarunner een over dat „Fräulein Margaretha von Waldeck (* 1533 † 15. Määrt 1554 in Brüssel), van de overall vertellt wurr, wo mooi se was. Se was dat Vörbild för Sneeiwittje! Hör Vader stüürde dat 16jahrige Wicht na Brüssel an de kaiserlike Hoff, daar wurr se Ehrenjüffer bi de Königin Maria van Böhmen un Ungarn un wurr in de hoge Gesellskupp van Karl V. Inföhrt. Daar an de Kaiserhoff van de Habsburgers leerde Margaretha Prinzen ut de hoge Adel kennen, unner annern Philipp II. De was de eenzige legitime Söhn van Kaiser Karl un wurr later König van Spanien. Man as dat Gerücht umgung, dat düütse Frollein harr 'n dicke Steen in 't Bredd bi de Thronfölger, do wurr se mitmaal krank. Over hör Süükde schreev se ok in Breven an hör Vader. An d' 15. Määrt 1554 is Margaretha denn overleden, mit blot 21 Jahr, na 'n lange un sware Süükde. Of Gift daarbi 'n Rull spöölde, dat is neet seker, man antonehmen. Waar se begraven is, weet een neet, villicht sogaar in d' Kaisepalast in Brüssel. Wat weten wi noch mehr? Van Hessen ut liggt Brüssel „achter de Söven Bargen“. Un de Dwargen? Ok de sünd uptofinnen. Bi Bad Wildungen liggt dat Dörpje Burgfreiheit, un daar hebben in frohere Tieden Bargwarken west, un besünnerrs geern namm man lüttje Mannlüü för disse Arbeid, de passden beter in de Stollen. Un dat Sneeiwittje lever bi disse gode Mannlüü satt as in Huus bi hör Steevmoder – dat kann angahn. Daarto mutten Ji weten: Philipp IV. Van Waldeck was dreemaal traut, toeerst mit Margaretha Cirksena, denn mit Catharina von Holzfeld von Elben un uplest mit Jutta von Isenburg-Grenzau. Un wi weten, dat he dat Bild van sien eerste Frau Margaretha noch alltied up de Kaminsims stahn harr, as he lang mit Catharina traut was, Sneeiwittje hör Steevmoder … Mehr mutten wi hier neet brengen, blot andüden, wat dat daar to lesen gifft, un dat dat Book in de Welt un to kriegen is: Schneewittchen. Blonde Tochter einer Adligen aus Ostfriesland. Eine historische Spurensuche von Gudrun Anne Dekker. Verlag Books on demand 2013. Up düüts. 168 S., 40 Biller in Klöör. ISBN 9783732271184. Pries: 39,90 €.