Flinke Spraak Lesdens weer en Krankenwagen mit twee Sanitäters van Leer unnerwegens na Stallbrüggerfeld. In Busboomsfehn harren se sük totaal verfahren. Do hullen se tegen twee Fraulüü an, de daar nettakraat in d’ Tuun stunnen un frogen hör na de rechte Padd. De ollerde Frau verklaarde hör de Weg un weer mit beid Arms an ’t Fuchteln: „Da müssen Sie da links um zu und denn da“, se weer an ’t Överleggen, „da um die, die…“, man hör wull dat hoogdüüts Woord nich infallen. „Proten S’ man platt“, see de Bifahrer ungedürig, „dat geiht gauer!“ – Elise