Sachtjes spöölt dat Water över de fien Sand
krüselt sük fangt an to wüppen
dat wurrn Wellen groot
dat wurrn Bulgen vergrellt

Störm kummt up
pietscht dat Water in de Lucht
bruust huult spektakelt
mutt Lucht holen

Lett na
puust weker
eit binahst dat Water
still wurd dat

Swart un lurig hangt de Hemel
över de Stillte
Düüster Grummeln
kruppt ut de gruselk Wulken

Blitz un Dönner ballern daar manken
Dick Drüppen flappen
eerst enkelden
denn trummeln s’ hendaal
dat guust in Stremels

Mit Wüürd stöönt de Örgel
dat Bullwark van Stimmen

Up ’t Üterste ritt ’t of
Stumm dat Spill
Klang un Klöör verlaten mi
un ik kann nich singen